सोलापूर20 मिनिटांपूर्वी
- कॉपी लिंक
विवाहित महिलेस आत्महत्या करण्यास प्रवृत्त केल्याप्रकरणी संदीप राठोड (रा. विजय ब्रह्मनाथ नगर, मुळेगाव रोड) या तरुणाविरुद्ध गुन्हा दाखल झाला आहे. कविता प्रभाकर कल्याणम (वय ३५, रा. भारत नगर, जुना विडी घरकुल) यांनी तीन दिवसांपूर्वी ४ मार्चला घरी गळफास घेऊन आत्महत्या केली होती. त्यांच्या आई सुनंदा हरी चिक्का (रा. जी ग्रुप, जुना विडी घरकुल) यांनी एमआयडीसी पोलिसात ६ मार्च रोजी फिर्याद दिली आहे. ऑक्टोबर २०२१ ते ४ मार्च २०२३ या कालावधीत तो विवाहितेस त्रास देत होता. कविता कल्याणम यांचे पती तामिळनाडू येथे कामाला आहेत. त्यांना अकरा वर्षाचा मुलगा आहे.
सासू व सासरे आहेत. ते जुना विडी घरकुल सध्या राहत होते. यापूर्वी ते ब्रम्हनाथ नगर, मुळेगाव रोड येथे राहण्यास असताना त्यांच्या शेजारी राहणारा संदीप राठोड सोबत कविताचे प्रेमसंबंध होते. याबाबत नातेवाइकांनी समजावून सांगितल्यानंतर तिने प्रेमसंबंध तोडले होते. पुन्हा कविता कल्याणम या दुसरीकडे राहण्यासाठी आल्या. तेथे आल्यानंतरही ‘तू माझ्याशी असलेले प्रेमसंबंध तोडायचे नाहीत’, असे सांगत तो सातत्याने दमदाटी, मारहाण करण्याची धमकी देत होता. फोन करून त्रास देत होता. राठोडच्या त्रासाला कंटाळून त्यांनी घरी गळफास घेऊन आत्महत्या केली होती. फौजदार अनिल वळसंगे तपास करत आहेत. याबाबत पोलिस निरीक्षक राजन माने यांना विचारले असता, संदीप राठोड याचा शोध सुरू असल्याचे ते म्हणाले.
