दर्यापूर2 तासांपूर्वी
- कॉपी लिंक
शिक्षण हे व्यक्तिमत्व विकासासाठी असते. त्याचा चुकीने रोजगार किंवा नोकरीशी संबंध जोडला जातो, असे प्रतिपादन महाराष्ट्र लोकसेवा आयोगाचे माजी अध्यक्ष मधुकर कोकाटे यांनी केले. येवदा येथील कला वाणिज्य महाविद्यालयात कैलासवासी वासुदेवराव कोकाटे स्मृतीनिमित्त एक दिवसीय व्याख्यानमालेचे नुकतेच आयोजन करण्यात आले होते. त्या प्रसंगी अध्यक्षीय भाषणातून मार्गदर्शन करताना ते बोलत होते. कार्यक्रमाला उद््घाटक म्हणून संस्था सचिव गजानन कोकाटे, तर प्रमुख वक्ता म्हणून नरसम्मा कला विज्ञान महाविद्यालयाचे मराठी विभाग प्रमुख डॉ. पंकज वानखडे, डॉ. नासिरुद्दीन अन्सार, प्राचार्य डॉ. वाय. जी. सिंग उपस्थित होते.
संस्था सचिव गजानन कोकाटे यांनी आपल्या उद््घाटनपर मनोगतातून कै. वासुदेवराव कोकाटे यांच्या स्मृतीला उजाळा देवून त्यांच्या वाचन कौशल्याविषयी मार्गदर्शन करताना ज्ञान हे क्षितिजासारखे असल्याचे प्रतिपादन केले. व्याख्यानमालेचे प्रथम पुष्प गुंफताना डॉ. पंकज वानखडे यांनी संत गाडगेबाबा यांचा कर्मयोग व आजचे समाज जीवन या विषयावर सखोल विवेचन करून गाडगेबाबांच्या जीवनातील विविध प्रसंगाचे दाखले देताना उपस्थित श्रोत्यांना आत्मचिंतन करण्यास भाग पाडले. व्याख्यानमालेचे दुसरे पुष्प डॉ. नसिरुद्दीन अंसार यांनी गुंफले.
या वेळी त्यांनी शिक्षण आणि व्यक्तिमत्व विकास या विषयावर बोलताना श्रोत्यांची दाद मिळवली त्यांनी शिक्षणातून सकारात्मकता दृष्टिकोन, चरित्र, संयम, वाचन या बाबी द्वारे आपले खरे व्यक्तिमत्व साकारत जाते, हे विविध उदाहरणांमधून पटवून दिले. कार्यक्रमाचे सूत्रसंचालन डॉ. अतुल टेवरे, तर आभार प्रदर्शन डॉ. अनिल कत्रोजवार यांनी केले. मान्यवरांचा परिचय डॉ. सय्यद सज्जाद यांनी करून दिला. कार्यक्रमाला येवदा आणि पंचक्रोशीतील प्रतिष्ठित नागरिक, सरपंच, पोलिस पाटील, विद्यार्थी वर्गाचे पालक, महिला आणि महाविद्यालयातील पदवी आणि पदव्युत्तर विद्यार्थी मोठ्या संख्येने उपस्थित होते.
