छत्रपती संभाजीनगर17 मिनिटांपूर्वी
- कॉपी लिंक
मराठवाड्यात गोदाकाठच्या जिल्ह्यांना पुराचा फटका बसतो. त्यामुळे गोदाकाठच्या जिल्ह्यांनी सतर्क राहावे. तसेच मराठवाड्यातील जिल्हा प्रशासनाच्या नियंत्रण कक्षासह आपत्ती व्यवस्थापन यंत्रणा अधिकाधिक अद्ययावत व सज्ज ठेवा, अशा सूचना विभागीय आयुक्त सुनील केंद्रेकर यांनी दिल्या आहेत.
या अधिकाऱ्यांची होती विशेष उपस्थिती
विभागीय आयुक्त कार्यालयातील सभागृहात विभागीय आयुक्त केंद्रेकर यांनी आज मराठवाडा विभागातील आठही जिल्ह्यांच्या मान्सूनपूर्व तयारीचा आढावा घेतला. या वेळी जिल्हाधिकारी आस्तिककुमार पांडेय, मनपा आयुक्त जी.श्रीकांत, जिल्हा परिषदेचे मुख्य कार्यकारी अधिकारी विकास मीना, पोलिस अधीक्षक (ग्रामीण) मनीष कलवानिया, जलसंपदा विभागाचे मुख्य अभियंता विजय घोगरे, प्रादेशिक जलसंधारण अधिकारी वसंत गालफाडे, महवितरणचे मुख्य अभियंता सचिन तालेवार यांच्यासह विविध यंत्रणांचे प्रमुख अधिकारी उपस्थित होते. व्हिडिओ काॅन्फरन्सिंगद्वारे आठही जिल्ह्यांचे जिल्हाधिकारी, जिल्हा परिषदेचे मुख्य कार्यकारी अधिकारी तसेच पोलिस अधीक्षक यांच्यासह संबंधित यंत्रणांचे प्रमुख उपस्थित होते.
अद्ययावत यंत्रणा तयार ठेवण्याची दिली सूचना
केंद्रेकर म्हणाले की, आपत्ती व्यवस्थापनात सातत्याने संपर्क अत्यंत महत्त्वाचे आहे. आपत्तीपूर्व नियोजन करताना यंत्रणा अद्ययावत असावी. अत्याधुनिक तंत्रज्ञानाचा वापर व्हावा. माहिती देणारी साखळी तत्पर ठेवतानाच जिल्हा नियंत्रण कक्षाने सर्वदूर संपर्कसातत्य ठेवणे गरजेचे आहे. कोणत्याही संदेशाला दुर्लक्षित करू नका, आपला दूरध्वनी बंद राहणार नाही याची काळजी घ्यावी, अशा सूचना त्यांनी केल्या.
