आयपीएलच्या १५व्या हंगामात आज डीवाय पाटील स्टेडियमवर पंजाब किंग्ज आणि दिल्ली कॅपिटल्स यांच्यात लढत होणार आहे. या सामन्यातील एक्स फॅक्टर जाणून घ्या. आयपीएल २०२२मध्ये आज ६४वी लढत पंजाब किंग्ज आणि दिल्ली कॅपिटल्स यांच्यात होणार आहे. नवी मुंबईच्या डीवाय पाटील स्टेडियमवर होणारी ही लढत दोन्ही संघासाठी प्लेऑफच्या दृष्टीने महत्त्वाची आहे. पंजाब आणि दिल्लीला जर प्लेऑफमध्ये पोहोचायचे असेल तर आजची लढत कोणत्याही परिस्थितीत जिंकावी लागणार आहे.
दोन्ही संघांनी आतापर्यंत १२ सामने खेळले आहेत. यापैकी प्रत्येकी ६ लढतीत विजय मिळवलाय. पंजाबचा संघ १२ गुण आणि प्लस ०.०२३ नेट रनरेटसह गुणतक्त्यात सातव्या स्थानावर आहे दिल्लीच्या संघाने १२ गुण आणि प्लस ०.२१० गुणांसह गुणतक्त्यात पाचव्या स्थानावर आहेत. आयपीएलमध्ये हे दोन्ही संघ २९ वेळा भिडले आहेत. त्यापैकी १५ वेळा दिल्लीने तर १४ वेळा पंजाबने बाजी मारली आहे.
आयपीएल २०२२मध्ये दोन्ही संघात एक लढत झाली होती. तेव्हा दिल्लीने ९ विकेट आणि ५७ चेंडू राखून विजय मिळवला होता. पंजाबने प्रथम फलंदाजी करताना फक्त ११६ धावा केल्या होत्या. दिल्लीने १ विकेट गमावून १०.३ षटकात विजय मिळवला. सलामीवीर डेव्हिड वॉर्नरने ३० चेंडूत नाबाद ६० धावा केल्या होत्या.
एक्स फॅक्टर
दोन्ही संघात एकापेक्षा एक मॅच विनर खेळाडू आहेत. पंजाबकडे भानुका राजपक्षे, जॉनी बेयरस्टो, लियाम लिविंगस्टोन असे स्फोटक खेळाडू आहेत. दिल्लीकडे डेव्हिड वॉर्नर, कर्णधार ऋषभ पंत, मिशेल मार्श आणि रोवमॅन पॉवेल.
पिच रिपोर्ट
डीवाय पाटील मैदानावरील पिच आता धीमे झाले आहे. टॉस जिंकणाऱ्या संघाने चांगली धावसंख्या केली तर विजय मिळवता येतो. दुसऱ्या डावात खेळपट्टी स्लो होते, त्यामुळे धावा करण्यात अडचणी येतात. आज देखील टॉस जिंकणारा संघ प्रथम फलंदाजी करण्याचा निर्णय घेऊ शकतो.
संभाव्य संघ-
पंजाब किंग्ज- जॉनी बेयरस्टो, शिखर धवन, भानुका राजपक्षे, मयांक अग्रवाल, जितेश शर्मा, लियाम लिविंगस्टोन, ऋषी धवन, कगिसो रबाडा, राहुल चहर, हरप्रीत बरार, अर्शदीप सिंह.
दिल्ली कॅपिटल्स- पृथ्वी शॉ, डेव्हिड वॉर्नर, मिचेल मार्श, ऋषभ पंत, ललित यादव, रोवमॅन पॉवेल, अक्षर पटेल, शार्दुल ठाकूर, कुलदीप यादव, खलील अहमद, एनरिक नॉर्जे
