आयपीएलमध्ये शुक्रवारी राजस्थान रॉयल्स आणि दिल्ली कॅपिटल्स यांच्यातील लढत नो-बॉल वादामुळे अधिक चर्चेत आली. पण या वादाच्या आधी सामन्यात एक वादळी फलंदाजी पाहायला मिळाली. राजस्थानचा सलामीवीर जोस बटलर सध्या करिअरच्या सर्वोत्तम फॉर्ममध्ये आहे. त्याने देवदत्त पडिक्कलसोबत १३ वर्ष जुना विक्रम देखील मोडला. आयपीएल २०२२मध्ये त्याने तिसरे शतक झळकावले. दिल्लीच्या गोलंदाजांची अशी धुलाई याआधी कोणीच केली नाही. परदेशी खेळाडूंमध्ये एका हंगामात सर्वाधिक शतक करण्याचा विक्रम बटलरच्या नावावर झालाय.
बटलरने याआधी मुंबई इंडियन्स विरुद्ध ६८ चेंडूत १०० धावा केल्या होत्या. ते त्याचे या हंगामातील पहिले शतक ठरले. त्यानंतर कोलकाता नाईट रायडर्सविरुद्ध ६१ चेंडूत १०३ धावा केल्या आणि काल दिल्ली कॅपिटल्स विरुद्ध ६५ चेंडूत ११६ धावांची वादळी खेळी केली. या हंगामात बटलरने ७ सामन्यात १६१.५च्या स्ट्राईक रेटने आणि ८१.८३च्या सरासरीने ४९१ धावा केल्या आहेत. यात ३ शतक, २ अर्धशतकांचा समावेश आहे. बटलरने ४१ चौकार आणि ३२ षटकार मारलेत.
दिल्लीविरुद्ध धीमी सुरुवात करणाऱ्या बटलर आणि देवदत्त पडिक्कल यांनी पॉवर प्लेनंतरच्या षटकात गोलंदाजांची जी धुलाई केली ती पाहण्यासारखी होती. या दोघांनी शतकी भागिदारी केली. २०१५नंतर राजस्थानच्या सलामीवीरांनी अशी शतकी भागिदारी केलीय. इतकच नाही तर या दोघांनी राजस्थानचा १३ वर्षापूर्वीचा विक्रम मोडला. २००९ साली ग्रॅमी स्मिथ आणि नमन ओझा यांनी पंजाबविरुद्ध पहिल्या विकेटसाठी १३५ धावांची भागिदारी केली होती. आता बटलर-पडिक्कल जोडीने १५५ धावा केल्या. बटलरच्या या तिसऱ्या शतकामुळे ऑरेंज कॅपच्या स्पर्धेत त्यांने मोठी आघाडी घेतली आहे. राजस्थानने मेगा लिलावाच्या आधी बटलरला १० कोटींनी रिटने केले होते.
एका हंगामात सर्वाधिक शतक करण्याचा विक्रम विराट कोहलीच्या नावावर आहे. त्याने २०१६ साली आरसीबीकडून खेळताना ८१.०८च्या सरासरीने ९७३ धावा केल्या होत्या. या विक्रमाच्या जवळपास देखील कोणी पोहोचले नाही. तेव्हा विराटने १६ सामन्यात ४ शतक केली होती. आता बटलर ज्या फॉर्ममध्ये आहे, ते पाहता विराटचा विक्रम मोडण्याची शक्यता आहे.
