एका तासापूर्वी
- कॉपी लिंक
छत्रपती संभाजीनगर नामकरणाच्या समर्थनार्थ महाराष्ट्र नवनिर्माण सेनेच्या वतीने ‘स्वप्नपूर्ती’ मोर्चाचे आयोजन करण्यात आले आहे. शहराचे ग्रामदैवत असलेल्या श्री. संस्थान गणपती येथून विभागीय आयुक्त कार्यालयापर्यंत हा मोर्चा जाणार आहे. मात्र पोलिसांनी या रॅलीला परवानगी नाकारली आहे. असे असले तरी, परवानगी नाकारल्यानंतरच ही रॅली होणार असल्याचे महाराष्ट्र नवनिर्माण सेनेचेच्या वतीने स्पष्ट करण्यात आले.
रॅलीसाठी अशा प्रकारचे पोस्टर सर्वत्र लावण्यात आलेले आहेत.
औरंगाबाद शहराचे नामांतर छत्रपती संभाजीनतगर करण्यात आले असून या विरोधात एमआयएमच्या वतीने जिल्हाधिकारी कार्यालयासमोर आंदोलन सुरू करण्यात आले आहे. या आंदोलनाच्या माध्यमातून छत्रपती संभाजीनगर नामांतरांना विरोध करण्यात येत आहे. या आंदोलनाला उत्तर देण्यासाठी महाराष्ट्र निर्माण सेनेच्या वतीने छत्रपती संभाजीनगर नामांतराच्या समर्थनार्थ या रॅलीचे आयोजन करण्यात आले आहे.
पोलिसांनी नाकारली परवानगी
पोलिसांच्या वतीने मनसेचे जिल्हाध्यक्ष सुमित खांबेकर यांना देण्यात आलेली नोटीस.
महाराष्ट्र नवनिर्माण सेनेच्या वतीने काढण्यात येणाऱ्या रॅलीला पोलिसांच्या वतीने परवानगी नाकारण्यात आली आहे. फौजदार प्रक्रिया संहिता कलम 149 नुसार देण्यात आलेल्या नोटीसीद्वारे ही परवानगी नाकारण्यात आली आहे. यासंबंधीचे पत्र महाराष्ट्र नवनिर्माण सेनेचे जिल्हाध्यक्ष सुमित खांबेकर यांना पोलिसांनी पाठवले असून, त्यात कायदा सुव्यवस्थेचे नुकसान झाल्यास कडक कारवाई करण्याचा इशारा देण्यात आला आहे.
तरी रॅली होणारच
पोलिसांनी परवानगी नाकारली असली तरी हा मोर्चा आपण काढणार असल्याचे महाराष्ट्र नवनिर्माण सेनेच्या वतीने स्पष्ट करण्यात आले आहे. यासाठी संस्थान गणपती परिसरात जय्यत तयारी करण्यात आली आहे. तसेच जालना येथून छत्रपती संभाजी नगरकडे मनसेचे कार्यकर्ते निघाले आहे. त्यांनी जालना येथून निघताना रेल्वेवर छत्रपती संभाजीनगरचे स्टिकर देखील लावले.
