अमरावतीएका तासापूर्वी
- कॉपी लिंक
कोणताही समाज एकसंघ असणे हे स्तुत्यच आहे. मात्र जाती – पोटजातीच्या पलिकडे जाऊन सर्व समाजाने एकत्र होत एकविसाव्या शतकाला आवश्यक असलेले मनुष्यबळ तयार करण्यासाठी प्रयत्न करावे, असे आवाहन राज्याचे उपमुख्यमंत्री तथा जिल्ह्याचे पालकमंत्री देवेंद्र फडणवीस यांनी आज, रविवारी येथे केले.
अखिल भारतीय कलवार कलाल कलार महासभा दिल्लीच्या प्रदेश शाखेतर्फे आयोजित महामेळाव्याच्या अध्यक्षस्थानाहून ते बोलत होते. येथील सांस्कृतिक भवनात पार पडलेल्या या कार्यक्रमाला महासभेचे राष्ट्रीय अध्यक्ष शंकरभाई पटेल, कलालरत्न दीपक जैस्वाल, डॉ. बी. आर. काकपुरे, खासदार डॉ. अनिल बोंडे, आमदार प्रवीण पोटे पाटील, आमदार प्रताप अडसड, माजी आमदार केशवराव मानकर, भाजपच्या जिल्हाध्यक्ष निवेदिता चौधरी- दिघडे, शहराध्यक्ष किरण पातुरकर आदी मान्यवर उपस्थित होते.
उपमुख्यमंत्री फडणवीस पुढे म्हणाले, कलाल समाजाला महर्षी भृगूलपासून मोठी परंपरा आहे. कलाल समाजातील नागरिकांनी विविध क्षेत्रात पदार्पण करून यश मिळविले आहे. हा समाज इतर सर्व समाजांसोबत साहचर्य ठेवून आहे. समाजाच्या प्रगतीसाठी संघटन आवश्यक आहे. मजबूत समाज संघटनेव्दारे आपण समाजातील अडीअडचणी सहकार्याने सोडवू शकतो. यासाठी समाज बांधवांनी स्वयंप्रेरणेने पुढे येण्याची गरज आहे. समाजाने उभ्या केलेल्या सामुहिक रचनेचे आपण लाभार्थी आहोत. असाच लाभ पुढील पिढीलाही मिळावा, यासाठी सर्वांनी एकत्रितपणे कामे करावीत, अशी सूचनाही त्यांनी केली.
कलाल समाजाच्या प्रगतीबाबत बोलताना खासदार डॉ. बोंडे म्हणाले, कलाल समाज हा उद्योग, शिक्षण तसेच विविध क्षेत्रात प्रगतीपथावर आहे. ‘समाजातील ऐक्य’ हे समाजाला पुढे नेण्यास मदतीचे ठरते. सामुहिक उपवर युवक-युवती परिचय महासंमेलनामुळे आर्थिक तसेच वेळेची बचत होते. कलाल समाजाने यापुढेही सामाजिक एकोपा कायम राखत यशाची घोडदौड सुरु ठेवावी, अशा शुभेच्छाही त्यांनी दिल्या. कार्यक्रमाचे प्रास्ताविक महासभेचे राष्ट्रीय सचिव ललीत समदुरकर यांनी केले. संचालन व आभार प्रदर्शन प्राजक्ता मशीदकर-राऊत यांनी केले.
यांचा झाला सत्कार
यावेळी ‘कलाल रत्न’ म्हणून डॉ. ओंकारराव बिहाडे, आनंद भामोरे, पी.बी. उके व राजेंद्र डांगे, ‘कलाल गौरव’ म्हणून डॉ. आशिष डगवार, लक्ष्मीनारायण मालवीय, डॉ. चित्तरंजन गांगडे, रामकृष्णराव मेश्राम व शामलाल चौथमल, ‘कलाल श्री’ म्हणून बबनराव पेलागडे, मोहनलाल जैस्वाल, वैभव फरकुंडे, अनिल मालवीय, शेषराव सहारे व उज्वल सामुद्रे तर ‘कलाल श्रीमती’ म्हणून विणा पटले, स्नेहा राय, माधुरी घोसेकर, व प्राजक्ता पातुर्डे यांचा सत्कार करण्यात आला.
