प्रतिनिधी | मिरजगाव24 मिनिटांपूर्वी
- कॉपी लिंक
कर्जत तालुक्यात क्रिकेटचे रणजी सामने खेळले जातील, एवढे मोठे भव्य क्रीडा संकुल ११ एकरांवर तालुक्यातील राशीन येथे उभारणार आहोत. पुढील महिन्यातच या कामाचा शुभारंभ करण्यात येईल. या भागातील उत्कृष्ट खेळाडूंना चांगल्या दर्जाचे मैदान उपलब्ध व्हावे, तसेच जास्तीत जास्त खेळाडू तयार व्हावेत, यासाठी हे क्रीडा संकूल उभारणार असल्याची माहिती आमदार रोहित पवार यांनी दिली. मिरजगाव येथील टायगर अॅकॅडेमीच्या विद्यार्थी-विद्यार्थिनी घेतलेल्या उंच भरारीचे कौतुक करताना व विविध शासकीय सेवेत भरती झालेल्या मुलांचे सत्कार समारंभात ते बोलत होते.
मुलांनी विविध खेळांमध्ये प्राविण्य मिळवण्यासाठी नेहमी उत्साही राहून प्रयत्न करावा. या भागातील प्रत्येक खेळाडूंना या क्रीडा संकुलात प्राधान्य दिले जाईल. क्रिकेटसोबतच कुस्ती, कबड्डी, बॅडमिंटन, धावणे, लांब उडी, तसेच जिमनॅशीयम हॉलचेदेखील काम करणार आहोत. तसेच, इतर भागातून किंवा राज्यातून खेळासाठी किंवा सरावासाठी येथे येणाऱ्या मुला-मुलींच्या राहण्याचीदेखील सोय करण्यात येणार असल्याचे पवार यांनी सांगितले या कार्यक्रमास मिरजगाव पोलिस स्टेशनचे सहाय्यक पोलीस निरीक्षक सोमनाथ दिवटे, माजी जि.प. सदस्य परमवीर पांडुळे, रघु आबा काळदाते, व्यापारी बापू कासवा, संपत बावडकर, गोरखनाथ चौकडे, अनिल पांडुळे, रमेश खेतमाळीस, पप्पू कोठारी, जयसिंग थिटे, राम रंधवे, तानाजी पिसे, विलास मुळे, टायगर अॅकॅडमीचे संचालक शरद चौकडे, सत्कारमूर्ती मुले-मुली, तसेच अॅकॅडमीचे प्रशिक्षणार्थी मुले-मुली मोठ्या संख्येने उपस्थित होते. सर्वसामान्य कुटुंबातील हुशार व होतकरू विद्यार्थ्यांना मदतीचा हात देण्याचे काम ॲकॅडमीचे संचालक शरद चौकडे करीत असल्याचे पवार म्हणाले. शासकीय सेवांमध्ये भरती झालेल्या सर्व विद्यार्थ्यांना सहाय्यक पोलीस निरीक्षक सोमनाथ दिवटे यांनीही भरभरून शुभेच्छा दिल्या.
